Hanova ny fiainan’ireo mponina ao amin’ny distrikan’i Vatomandry sy Brickaville ny taninketsa indostrialy napetraka any an-toerana. Ny alakamisy teo, nandray ny milina fanamboarana gilasy fitehirizana sakafo ny tao Vatomandry. Mivelona amin’ny jono ny ankamaroan’ny mponina noho ity toerana ity misy ranomasina sy ranomamy. “Mahatratra 3 taonina isan’andro ny gilasy vitan’ity milina ity”, hoy ny minisitry ny Fampiroboroboana ny indostria sy ny varotra ary ny fanjifana, Razafindravahy Edgard, rehefa niresaka tamin’ireo mponina sy ireo tomponandraikitra samihafa avy ao amin’ny distrika, ireo mpanjono mivondrona anaty kaoperativa ary ny mpandraharaha. Nankasitraka ny fahazoana ilay milina ny filohan’ny fikambanan’ny mpanjono.
Manodim-bokatra
Nahazo ozinina hanodinana ny akondro sy vomanga ho lasa chips ny distrikan’i Brickaville. Mamokatra akondro 160.000t sy 40.000t vomanga ny faritra. Matetika simba nefa ny vokatra noho ny tsy fisian’ ny fanodinana ankoatra ny fanondranana izany. Antony nametrahana ny ozinina mpanodina izany mba tsy ho simba. Ankoatra izay, niresaka tamin’ ny minisitra ireo tantsaha sy ny olom-boafidy ao an-toerana momba ny olana amin’ny fikarakarana an-tontan-taratasy amin’ny fanondranana kanelina mankany ivelany.
Henintsoa Hani
French