Hiavaka tanteraka ny lanonana fanokafana sy famaranana ny lalaon’ny Nosy, hatao eto Madagasikara. Sinoa manam-pahaizana 8 mianadahy no hanampy ny Malagasy teknisiana amin’izany.
Nigadona teto Madagasikara, ny fiatombohan’ity herinandro ity, ireo sinoa manam-pahaizana 8 mianadahy, hiantoka ny fandavorariana ny lanonana fanokafana sy famaranana ny lalaon’ny Nosy, andiany faha-11. Hijanona eto izy ireo mandra-pahatapitry ny hetsika rehetra, araka ny fanazavana nentin’ny teo anivon’ny COJI (Comité d’Organisation des Jeux des Iles). “Tsy hoe tsy manana manam-pahaizana manana traikefa isika fa hanampy sy hanome toromarika hanatsarana bebekokoa ny lalaon’ny Nosy, ireo sinoa 8 mianadahy ireo”, hoy ny nohamafisin’ny minisitry ny Tanora sy ny fanatanjahantena, Resampa André Haja. Efa manana traikefa manokana izy ireo amin’ny fikarakarana hetsika matihanina. Gasy avokoa no handray anjara amin’ny lanonana fanokafana sy famaranana io fa ny sinoa fotsiny no hanofana sy hampianatra ireo voatsonga handravaka ny lanonana rehetra.
Tafiditra anatin’ny fiaraha-miasan’i Madagasikara sy ny firenena sinoa izao fanampiana ataon’ireto manam-pahaizana manokana ireto izao. Hiavaka, araka izany, ny seho rehetra ho hita amin’io lalaon’ ny Nosy ho avy io.
Mi.Raz
French