Maty tsy tra-drano ny zazavavy iray nohosen’ny kamiao, tao amin’ny fokontany Antohobe, distrikan’i Betafo, ny 29 jolay teo. Nandeha mafy ity fiara mpitatitr’entana ity. Nahazo ny RN-34, sendra zaza niampita tampoka ny arabe ny mpamily, teo amin’ny PK 43 + 300. Tsy tafajanona intsony ny fiara. Tetsy andaniny, nentin’ny hatairana, tsy nahahetsika ilay zaza. Voahosin’ny fiara izy ka lavo tamin’ny tany. Notetezin’ny kodiaran’ilay kamiao ny vatan’io zazavavy io. Vokany, maty tsy tra-drano. Nitangorona ny fokonolona nanatri-maso . Nahare ny zava-nisy, nijery ifotony ny raharaha ny zandary. Nosamborina avy hatrany ny mpamily ny kamiao. Naiditra ambalam-pamonjana ny fiara. Natolotra ny fianakaviany, taorian’ny fizahana ny razana. Ankoatr’io, kamiao iray nifaoka mpitondra taksibrosy teo Ambalaranokely, distrikan’ i Maevatanana, afakomaly. Nivoaka ny fiara izay nijanona amin’ny sisin’ny arabe ny mpamily, teo amin’ny PK-318 . Tampoka, voafaokan’ny kamiao ilay mpamily taksibrosy. Maty tsy tra-drano izy. Samy nikasa hihazo an’i Mahajanga ireto fiara tra-doza ireto. Manoloana ny tranga tahak’izao, notsindrian’ny zandary fa ilana fitandremana ny fampiasana lalam-pirenena hisorohana ny loza. Voakasik’izany avokoa ny mpamily sy ireo lalan’ny mpandeha an-tongotra.
Tsiferana R.
French