Tselatra

Nidoboka am-ponja ilay mpamily nahafaty zazalahy 7 taona tao Toamasina Renivohitra, ny faran’ny herinandro teo. Tsiahivina, maty noraofin’ny 4×4 io zazalahy io raha toa ka nosokirina tao anelanelan’ny tamboho sy ny fiara ny reniny, ny alin’ny 23 jolay lasa teo.. Niafara amin’ny fampidirana am-ponja ny mpamily izany.
Mpaka an-keriny roa maty voatifitry ny miaramila tao amin’ny kaominina Andranomisa, distrikan’ Anjo­­zo­robe, ny zoma 28 jolay teo. Efa nokarohina hatry ny ela noho ny tranga fihazonana takalonaina tao amin’io distrika io izy mirahalahy ireto. Mitohy ny fitadiavana ireo mpiray tendro aminy.
Mpiambina tranon’akoho iray may vokatry ny firehetan’ny trano sy ny akoho an’arivony tao amin’ny fokontany Tsimenatse Atsinanana, Toliara, omaly maraina. Nanano sarotra ny famonoana ny afo noho ny hasarotan’ny lalana ho an’ny mpamonjy voina. Nentina notsaboina eny anivon’ny hopitaly ilay mpiambina . Lasa lavenona ny akoho 10 000 isa.
Lehilahy iray nahatrarana basy tsy ara-dalàna niampy bala miisa efatra tao Antovontany ambony, kaominina ambanivohitra Androvakely, afakomaly. Nosa­vain’ny zandary ny trano fonenany ka tratra tao ny ody bala milanja 2 kg sy antsy lavalela iray. Ahina ho mpandray anjara amin’ny halatra omby sy fakana an-keriny izy ka nosamborina.