Niara-namoy ny ainy ny mpamily sy ny mpanampy azy, afakomaly. Taraiky tao ambanin’ny kamiao namboarina izy ireo rehefa nisy fiara lehibe iray nifaoka tanaty haizina.
Niara-maty vokatry ny lozam-pifamoivoizana tao Bemasoandro, Anosibe Ifody, distrikan’i Moramanga, ny mpamily iray sy ny mpanampy azy, afakomaly. Tratry ny tsy fahatomombanana ny kamiao nentin’izy ireo. Nanamboatra izany tao ambanin’ny fiara izy roa lahy. Tokony ho tamin’ny 1 ora sy sasany maraina, tsy nanampo na inona na inona ny mpamily ny fiara lehibe iray. Ny andro maizina rahateo, ka nifatratra avy hatrany tamin’ilay fiara namboarina teo amin’ny arabe izy. Vokany, tavela tao ambanin’ny fiara noezahiny novelomina ilay mpamily sy ny mpanampy azy. Maty tsy tra-drano potika tao ambanin’ ny fiara izy ireo. Ankoatra azy ireo, nisy tovolahy iray naratra tao anatin’ilay fiara nandona.
Mpitondra scooter tapa-tongotra
Nifandona tamin’ny moto iray mifanohi-dia taminy ka tapa-tongotra ny mpitondra scooter iray teo Ankazomanga, omaly maraina. «Nangalatra niditra havanana izy», hoy ny mpamily ny moto iray tsy naratra. Tao anaty
fitohanan’ny fifamoivoizana, nitera-doza indray ny kodiaran-droa. Nandeha mafy ireo moto roa. Potika tanteraka ilay moto lehibe. Handeha hamadika ny iray tamin’ireo mpitondra moto niharan-doza ireo. “Vao omaly no nitrangana lozam-pifamoivoizana teto”, hoy ny mponina eo an-toerana.
Ankoatra ny tranga voatanisa ireo, olona iray hafa koa maty voafaokan’ny taksibrosy teo amin’ny RN 34, PK 20+100, Ambohinaorina, fokontany Ambodihady, kaominina Betafo, afakomaly. Nifatratra tamin’ny mpandeha tongotra ilay fiara tapaka hisatra. Olona valo voafaoka ka tsy tana ny ain’ny iray tamin’ izy ireo.
Tsiferana R.
French