Andro miditra ! Nivarina tany anaty rano tao Vohiparara Ranomafana, RN25, omaly, ny fiara iray nitondra razana. Resin-tory tampoka ny mpamily ka tsy nahafehy ny familiana intsony. Nisy tamin’ireo fianakaviana tao anaty fiara no naratra. Tsy nisy kosa ny aina nafoy.
Voatery naiditra ambalampamonjana ny kamiaobe iray nitondra olona marobe niaraka tamin’ny entana tao Antsirabe. Teo amin’ny fiantsonana Vatofotsy ny mpamily no nampiditra ireto mpandeha ireto ary nikasa ho any Andrakodavaka. Nalain’ny zandary koa ny taratasy fahazoana mitondra fiara teny aminy.
Maro tamin’ireo mpijery valim-panadinana tamin’ireo lycée teto an-drenivohitra no nitaraina ho voaendaka sy very finday. Nanararaotra ny fahamaroan’ny olona nitangorona ireo olon-dratsy ka nanao ny ataony koa.
Lehilahy iray naratra mafy voadonan’ny fiara teny Anosy, omaly tolakandro. Variana niandrandra nijery ny andrimby mitondra ny fifamoivoizana mandeha amin’ny tariby izy kanjo tsy hitany ny fiara tao aoriany. Voadona izy ka voatery nentina tany amin’ny hopitaly.
French