Tselatra

Olona iray maty, efa naratra. Io no vokatry ny fianjeran’ny fiaramanidina kely iray hofain’ny orinasa Aqualma amin’ny Sky Service tao Fenoarivo Besakoa kaominina ambanivohitr’i Mahajamba Mahajanga II. Teo am-piaingana no nitranga ny loza. Nianjera ka nirehitra avy hatrany ilay fiaramanidina. Nentina hopitaly ireo naratra.
Olona telo tratra tao anaty kamiao mpitondra omby, teny amin’ny RN7, Antsirabe,omaly. Nosam­borina noho ny tsy fanajana ny lalàna mifehy ny fifamoivoizana ny mpitondra ny kamiao. Notanana koa ireo telo lahy.
Mpivarotra rongony telo lahy tratra teny amin’ny RN2, Ambatoloana, ny 19 aogositra teo. Anisan’ireo mpandeha tao anatin’ny taksiborosy ireo olona telo tratra niaraka tamin’ny rongony 5 kg ireo. Nosamborina koa ny mpamily ny fiara izay nahafantatra ny fisian’ireo entana ireo.
Tamboho lehibe iray nianjera tampoka teny amin’ny fiantsonan’ny taksibe, ao Mahitsy, omaly. Fiara mpitatitra miandry mpandeha lasibatra. Natosiky ny ranon-tany tao anatin’ilay tamboho ka nitarika ny fianjerany.