Vory lanona ny vahoaka: nahasondrina ny seho sy ny ravaka antsehatra

Tontosa tao anaty hafaliana sy haravoana ny lanonana fanokafana ny lalaon’ny Nosy andiany faha 11, omaly, teny amin’ny kianja Barea Maham­a­sina. Seho ara-javakanto isan-karazany no nentina nanokafana izany lanonana izany. Anisan’izany ny fihetsika mi­rindra sy ny seho an-tsehatra, izay samy nanehoana ny maha izy an’i Madagasikara. Tena nampitolagaga ny maro, nandritra iny lanonana fanokafana iny ny fampisehoana tamin’ny alalan’ny jiro maroloko. Mala­gasy mpahay kanto, mpihira, maro samihafa no nampifaly sy nanafana ny sehatra tamin’ izany. Seho nahasondrina ny mpijery no nandravaka ny lanonana fanokafana. Nano­katra izany ny an’ny mpitsoka mozikan’ny Tafika Malagasy. Nentina nandraisana ireo vahiny kosa ny hira “Manakory nareo” an’i Mika sy Davis, nitohy tamin’ny seho nataon’i Smaven, narahina dihy mirindra. Taorian’izay, nisy ny seho nampahafantarana an’i Mada­gasikara notontosain’ny ankizy malagasy, maherin’ny 1500, avy amina vondrona mpandihy sahala amin’ny Rindra Ramili, Vals&Laurence, Ankizy Aka­ma­soa, GB Wild, M2Z Dance, Stand’Art, Ravo Raboanari­soa. Fihetsika mirindra sy dihy maro samihafa, nolaroina zava­maneno malagasy sy feonkira isan-karazany no nanomezan’ ireto ankizy ireto fahafinare­tana ny mpijery tao Mahama­sina. Nandravaka izany seho izany ihany koa ny fandraisan’anjaran-dRajery sy ny Bloco Malagasy. Nahafinaritra ny mpijery ihany koa ny nanehoan’ireo ankizy an-tsehatra ny tantaran’i Madagasikara. Tantara nanehoana ny fiainan’ ny Malagasy taloha sy nandritra ary taorian’ny fanjanahantany.
Teo ihany koa ny fane­hoana ireo harena ara-kolon­tsaina maro avy amin’ny foko rehetra eto Madagasi­kara. Ankoatra izay, nanamarika iny lanonam-panokafana iny ny seho tamin’ny alalan’ny jiro maro samihafa, izay tena nandrasan’ny maro. Fampise­hoana niarahana tamin’ny Ma­lagasy mpahay kanto, mpihira, no namaranana ny lanonana.

Partager sur: