Atletisma: noporofoin’i Sidonie ny maha andrarezina azy

Na tsy salama aza i Sidonie Fiadanantsoa, mbola norombahiny ny medaly volamena teo amin’ny 100 m misy fefy, vehivavy, taranja atletisma. Andro faharoa notanterahina omaly alarobia, tetsy amin’ny kianja Alarobia. Tontosany, tao anatin’ny 13 s 14 ampahazatony izany. Nifampitady hatrany am-piaingana izy sy ilay rénionais, i Esther Conde Turpin, tonga faharoa. «Misaotra an’Andria­manitra aho fa na teo aza ny fivalanana nahazo ahy, vita ihany iny ary nahazo ny medaly volamena. Raha salama aho tsy tokony ho iny
ny vokatra», hoy izy. 13 s 17% ny fe-potoanan’i Turpin. Fahatelo, Ravololonihanta Estella, 14 s 65%. Medaly volamena faharoa azon’ny Malagasy omaly ihany koa ny 1 500 m, lehilahy, lasan’i Tahinjanahary Tsima, tamin’ny 04 mn 03 s 61%. Nitarika am-boalohany ilay maorisianina, i Ilshad Dookun, saingy narahin’i Tsima fotsiny. Teo amin’ny 150 m tsy hahatongavana no nihoarany io mpifanandrina aminy io. Mbola Malagasy no tonga faharoa, Rakotondrainy Heriniaina, 04 mn 03 s 80%, fahatelo, i Dookun, 04 mn 04 s 63%. Lasan’i Madagasikara koa ny volamena teo amin’ny «Poids sport adapté», vehivavy ho an’ireo atleta manana fahasembanana, tamin’ny alalan’i Brigila Clair.