Manohana an’i Madagasikara amin’ny famatsiana herinaratra ny Banky iraisam-pirenena. Tanjona ny hisitrahan’ny 70% amin’ny tokantrano malagasy izany hatramin’ny taona 2030.
Mitentina 400 tapitrisa dolara ny famatsiam-bolan’ny Banky iraisam-pirenena hananganana foibe mpamokatra herinaratra avy amin’ny masoandro eto Madagasikara. Miisa 46 ny foibe hatsangana any amin’ny distrika 46, samy hamokatra 50 Mw tsirairay avy. Hitondra vahaolana goavana amin’ny tsy fahampian’ny herinaratra ny angovo avy amin’ny masoandro. Manodidina ny 2 000 KWh isaky ny 1m2 isan-taona ny herin’ny masoandro eto Madagasikara. Mitotaly 2 800 ora isan-taona ny fibaliakan’ny masoandro. Hanatanterahana ny tetikasa ny “Digital and energy connectivity for inclusion in Madagasikara” (Decim), eo ambany fiahian’ny minisiteran’ny Angovo sy ny akoranafo (MEH). Tanjona ny ahazoan’ny 70% amin’ny tokantrano malagasy herinaratra hatramin’ny taona 2030. Mandeha andro sy alina ny jiro amin’izany. Nilaza ny minisitra Andriamampionona Solo, fa « hisitraka azy daholo ny Malagasy tsy ankanavaka fa tsy ny mpanjifan’ny Jirama ihany ».
Eo am-pananganana ny foibe 32
Hitondra vahaolana ara-toekarena sy ara-tsosialy ary ara-tontolo iainana ity paikady vaovao ity. Lalana miampita any amin’ny fampiasana angovo madio satria azo havaozina ny 80% aminy. Hihena ny fampiasana sy ny fianteherana amin’ny angovo avy amin’ny solika.
Manodidina ny 7 900 Gwh ny herinaratra ho vokarina amin’ny taona 2030, raha 1 500 Gwh izany ankehitriny. Miisa 32 ny foibe efa eo am-pananganana amin’ireo 46 hatao.
Njaka Andriantefiarinesy
French