FANTINA sy FINTINA

Hanohy ny fiaraha-miasany amin’i Madagasi­kara ny International finance corporation (IFC) amin’
ny fampandrosoana ny tontolon’ny fiompiana eto Mada­gasikara. Voaresaka ireo sehatra laharam-pahamehana toy ny ronono, ny hoditra ary ny fitanterana sakafo mora simba. Hojerena ihany ny paikadim-pampandrosoana ny sehatry ny henan’omby.
Tanterahina ao amin’ny faritra Atsinanana ny drafitrasa “Fia Mora” hitsinjovana ireo tokantrano marefo sy hampiakarana ny tahan’ ny fihinanana trondro eto Ma­dagasikara. Tonga nanokatra ny hetsika ireo olom-boa­fi­dy any an-toerana sy ireo tomponandraikitra samihafa. Tanjona ny hanohizana ny hetsika toy izao mandavataona.
Nataon’ny minisiteran’ny Asa vaventy (MTP) ny fanarenana vonjimaika ny tetezan’Andrano­fasika
amin’ny lalampirenena RN4 (PK 451+ 150). Nohamafisina ny tahala amin’ny sisin-dalana, mialoha ny hidirana ny tetezana. Nitarina ny rafibato amin’ny sisin-dalana sy ny haben’ ny sisin-dalana. Napetraka koa ny fenitra famantarana toy ny fandokoana ny fanairana ny mampiasa ny lalana.
Hiara-kiasa ny fikambanana Vondrona Arrupe Madagasikara sy ny minisiteran’ny Tontolo iainana. Ifantohan’izany ny fandaharanasa LIFEE (Life and environemental education), amin’ny alalan’ny tetikasa Fagna­rena, izay hiompana amin’ny ady sy ny hiatrehana ny fiovan’ny toetr’andro.