Namoahan’ny fitsarana ambony didy higadra dimy taona an-tranomaizina ilay raim-pianakaviana nanolana ny zafiny vao sivy taona tao amin’ny kaominina Ambolizana, distrikan’i Toamasina faharoa, omaly. Zanaky ny zanany lahy ity zazavavy kely niharan’ny filàna ara-nofo ity. Napetrak’io zanany io taminy mba handrato fianarana arak’izany ilay zaza. Ny alin’ny 10 aprily hifohy ny 11 aprily 2022 anefa, nandeha tamin’ny toeran-kafa ilay ramatoa vadin’ity raim-pianakaviana ity. Io lehilahy lehibe io sy ilay zafiny irery arak’izany no niambina ny trano. Nesorin-drangahy tamin’izany ny akanjony ary nampihatra ny filàn-dratsiny tamin’io zafikeliny io izy. “Taitra tampoka aho efa tsy misy akanjo intsony izy ary nanao ny filàny”, hoy ilay niharan’ny fanolanana. Niteraka fanaintainana tamin’io zafikeliny io izany ka nitaraina tamin’ireo ray aman-dreniny ilay zaza. Nametraka ny fitoriana ireto farany ka niroso tamin’ny fisamborana ity nahavanon-doza. Nilaza ho tsy ho tompon’ny tenany fa nentin-javatra ity rangahy talohan’ny nahavoasambotra azy. Valo volana aty aoriana, niroso tamin’ny fitsarana ity raharaha ity ny tomponandraikitra tao an-toerana. Niafara amin’ny fampiharana sazy mihatra dimy taona an-tranomaizina an’ilay lehilahy lehibe izany.
Sajo/ Tsiferana R.
French