Tafiditra ao anatin’ny fandaharam-potoanan’ny kaonseritra klasika karakarain’ny Madagascar Mozarteum. Hanatanteraka seho lehibe, etsy amin’ny Institut Français de Madagascar (IFM) Analakely ny « Ensemble vocal Hiraitra ». Fampisehoana hotontosaina ny 20 desambra izao, manomboka 1 ora tolakandro, hitondran’izy ireo eny an-tsehatra ny « International Carol suites » narindran’i Mark Hayes. Antsa hanehoan’ny Hiraitra iny fiderana ny halehiben’ny voninahitr’Andriamanitra, indrindra amin’izao vanim-potoana hanamarihana ny krismasy izao. I Dominique Rakotonirina no hitarika ny fiarahana, i Antsa Ratsimba kosa no hanaraka amin’ny piano.
Andiany faha-134 amin’ny « Concert classique de midi » ity hotanterahin’ny Hiraitra ity. Hanasongadinan’ izy ireo ny fahaizana mampiara-peo sy fandrindrana izany miaraka amin’ny zavamaneno. Anisan’ny mampiavaka ireto andiana mpihira ireto rahateo ny fifehezan’ny tsirairay ny feo ananany.
HaRy Razafindrakoto
French