Taorian’ilay savorovoro tao amin’ny kariera Sahantona, kaominina Andohajango, distrika Mandritsara, ny zoma teo. Ankehitriny, olona 10 no voasambotry ny mpitandro filaminana, roa tamin’ireo kosa no mponina avy ao an-toerana. Mbola misy ny karohina momba ity raharaha ity, hoy ny zandarimaria. Maro ihany koa ireo foko antandroy namonjy fodiana taorian’ny korontana. Etsy ankilany, mampiantso fivoriana an’ ireo raiamandreny tsy ankanavaka ao amin’ny distrika ny Sojabe ao an-toerana, ny alakamisy izao. Hatao izany handinihana momba ny karieran’i Sahantona, hoy ny loharanom-baovao iray hafa. Tsiahivina fa nisy andian’olona mpitrandraka no nanao amboletra tao amin’ny toerana ipetrahan’ireo tompon-tanàna. Nanomboka nitrandraka izy ireo, antony nahatezitra ireo mponina. Nisy ny fifandonana teo amin’ny roa tonta ka trano 34 isa, vary, biby fiompy no kilan’ny afo. Toeram-pivarotana iray ihany koa voaroba.
Henintsoa H.
French