Niara-voatazona eny amin’ny zandary Ambohibao, ny alahady 12 mey teo, ny teratany sinoa iray sy ramatoa vadiny. Nifititra olona tsy nahy ilay ramatoa.
Nosamborin’ny zandary ao amin’ny zana-tobim-paritra Ambohibao ny teratany sinoa iray sy ny vadiny momba ny vono olona tao Miadapoana, kaominina Ambohibao Antehiroka, ny alahady 12 mey teo. “Sakaizan’ ilay vehivavy vadin’ny Sinoa io lehilahy voatifitra io fa tsy anadahiny”, hoy ny fanazavan’ny zandary eo anivon’ny zana-tobim-paritra Ambohibao. Nijanona tao an-trano io vehivavy io. Nirefotra tampoka ny basy. Voatifitra teo ambany tratrany ilay lehilahy voalaza ho sakaizany. “Nanara-maso tany amin’ny orinasa izay tsy lavitra ny trano fonenany ilay Sinoa tamin’io fotoana io”, araka ny fanadihadiana nataon’ ny zandary. Mpanao fanaka vita amin’ny “melamine” ity farany. Maty teo ambony fandriana an’ ireo teratany sinoa mivady anefa ilay lehilahy voatifitra. “Basy novidian’ilay Sinoa io nitifiran’ny vadiny ilay lehilahy io”, hoy ny zandary. Mpanao trano ao amin’ izy mivady ihany ity namoy ny ainy vokatry ny tifitra ity.
Fitsaram-bahoaka
Nitokona teo ivelan’ny tranon’ilay sinoa ny mponina manodidina. Nikasa hanao fitsaram-bahoaka tamin’ilay Sinoa izy ireo. Nifampiresaka tamin’ny solontenan’ny fokonolona ny zandary nahafahany nisoroka ny fihoaram-pefy. Araka ny loharanom-baovao hafa, nilalao domy tamin’ny mpiasany tao an-tokotaniny ilay Sinoa. Nirefotra tampoka anefa ny basy. Voatifitra tsy nahy tao anaty trano ny lehilahy iray. Tsy nandositra io teratany sinoa io nandritra ny fahatongavan’ny mpitandro filaminana ka voatana niaraka amin’ny vadiny. Hatolotra ny fampanoavana aorian’ny famotorana lalina izy ireo.
Tsiferana R.
French