Namoaka fofona maimbo, fatin-dehilahy iray hitan’ny fokonolona, nisy nandevina antsokosoko tao Sarimasina, fokontany Kianja avaratra, kaominina Behenjy, afakomaly. Mpandalo no nahatsikaritra io razana io. Nampandre ny manodidina sy ny mpitandro filaminana izy. Nanadihady sy nijery ny zava-nisy ny zandary. Lehilahy fotsy fihodirana tsy nisy volon-doha fa lava volom-bava io nisy nandevina io, nanao akanjo fohy tanana niloko maitso antitra sy pataloha mainty. Tsy nahitana taratasy mirakitra ny mombamomba azy teny amin’io lehilahy maty io. “Dimy andro teo ho eo no nisy nandevina antsokosoko io lehilahy io”, araka ny fizahan’ny tomponandraikitra. Efa simba tanteraka ny vatana mangatsiakany ka natolotry ny mpitandro filaminana ny fokonolona ny razana. Nalevin’izy ireo ao amin’ny fasam-bahiny ao an-toerana mandra-pahitana ny fianakaviany.
Tsiferana R.
French