Maty tsy tra-drano ny olona mianadahy tao amin’ny kaominina ambanivohitr’Ambinanindrano Mahanoro, ny alin’ny sabotsy lasa teo. Nisy alim-pandihizana nokarakarain’ olona iray tao an-toerana. Nanao fampisehoana ankalamanjana ny mpanakanto iray tamin’io fotoana io raha alim-pandihizana jiromena kosa ny alin’io. Olon-tsotra no nikarakara izany. Teo no nitranga ny olana noho ny tsy fahafaham-pon’ny mpanjifa, satria hoe ambany loatra ny fanamafisam-peo. Nangataka ny olona tao amin’io alim-pandihizana io mba hatao maimaimpoana ny fidirana. Ny tao anatiny te hivoaka, ny eny ivelany te hiditra. Raikitra teo ny fifanosehana nataon’ireo olona teny ivelany ka nitarika ny fahatezerana tamin’ireo olona sasany. Raikitra ny fifanjevoana tamin’ny alalan’ny tora-bato ny tranom-pokonolona. Maro ireo naratra tao anatin’ ny fifanjevoana. Niezaka nampitony izany ny zandary saingy tratran’ny tora-bato ihany koa. Araka ny fanazavan’ny ben’ny tanànan’Ambinanindrano, Imbinina André, niraradraraka ny tora-bato nataon’ireo olona ireo niantomboka tamin’ny 10 ora alina hatramin’ny 11 ora alina. Nanome baiko ny zandary ny depiote voafidy tao an-toerana mba hanaovana tifi-danitra hanaparitahana ireo mpanao fihetsiketsehana. Teo indrindra anefa no nitranga ny tsy nampoizina satria niantefa tamin’ny andrin-jiro ny bala ka niverina ary nahavoa ireo mianadahy tsy lavitra io andrin-jiro io. Vokany, naratra mafy ireo niantefan’ny bala ka voatery nentina namonjy toeram-pitsaboana. Tsy avotra intsony anefa ny ain’izy ireo noho ny tsy fahatomombanana tao amin’ity toeram-pitsaboana ity.
Sajo
French