La Teinturerie – Tarika Mbola Talenta
Ao anatiny tanteraka! Taorian’ ny seho fampahafantarana ny asabotsy teo, hiaka-tsehatra sahady etsy amin’ny La Teinturerie Ampasanimalo ry Mbola Talenta sy ny tariny, anio manomboka amin’ny 8 ora alina. Fotoana hizaran’izy ireo hatrany ny sanganasany, mozika miaina mifototra amin’ny tendry gitara ravahina zavamaneno malagasy izany. Hanampy an’i Mbola Talenta eo amin’ny gitara i Faly. Hikisaka eo amin’ny amponga maroanaka kosa i Fanilo Poppins, raha toa ka handray ny gitara beso i Fameno Poppin’s. I Litsakely eo amin’ny amponga sy ny zavamaneno ravaka hatrany, Rapà eo amin’ny sodina ary i Benja hampifandimby ny angorodao, ny trompetra ary ny lokanga.
Manambina – Rija Ramanantoanina
Taorian’ireo seho roa goavana niarahany nanatontosa tamin’i Lalatiana, manome fotoana ireo mpankafy azy indray i Rija Ramanantoanina, anio manomboka amin’ny 7 ora. Eny amin’ny Manambina Ambohimangakely io, ho an’ireo tia ny “cabaret”. Ankoatra izay, fantatra ihany koa fa mbola hisy ny seho Noely “Advent Show” izay hatao eny amin’ny FJKM Rasalama Martiora Ambohipotsy, ny alahady 18 desambra amin’ny 3 ora tolakandro, izay handraisan’i Rija Ramanantoanina sy i Elsie anjara. Hiaraka amin’izy ireo mandritra izany ireo mpitendry orga toa an-dry Manohisoa Rasamoelina, Tahiana Raveloson, Miravo Ramarolahy, Rindra Rakotosaonina ary Sonn.
Nangonin’i Zo ny Aina
French