Namoy ny ainy ny raim-pianakaviana iray tototry ny tany tao amina kariera fitrandrahana vatosoa, tao amin’ny fokontany Fotsialanana, kaominina Amboriala Andrafenkona, distrika Vohemar, ny zoma 31 mey teo. Samy nidina tao anatin’ny kariera ireo olona miisa telo, mpivahiny, ao an-toerana. Nahatsikaritra tranga hafahafa anefa ny zanaky ny mpitrandraka iray ka niakatra an-tanety. Voavonjy afaka nivoaka tao anatin’ilay lavaka izy. Tetsy ankilany, tavela tao anatin’ny lavaka amin’io toeram-pitrandrahana harena an-kibon’ny tany io ny rainy. Nihotsaka tampoka ny lavaka. Niezaka nanavotra azy ireo mpitrandraka sasany saingy tsy tana ny ainy. “Tsy manara-dalàna ireo mpitrandraka niharan-doza ireo noho izy ireo tsy manana taratasy fahazoan-dalana manokana hitrandraka”, araka ny fanazavan’ny tale misahana ny harena an-kibon’ny tany ao amin’ny faritra Sava. Misy fahazoan-dalana avy eo anivon’ny fokontany ireo mpitrandraka ireo saingy mbola eo am-panatontosana ny fanavaozana izany. Mijery ifotony sy miroso amin’ny fanadihadiana manoloana io tranga io ny tomponandraikitra ao an-toerana.
Tsiferana R.
French