Maty tsy tra-drano notetezin’ny kamiao teo amin’ny lohany ny lehilahy iray 20 taona tao tampon-tanànan’ Ambanja, omaly maraina. Nandalo toy ny fiara rehetra nifamezivezy io fiarabe io. Tampoka, voahitsaky ny kodiarana ny lehilahy iray. Nikoropaka nijery ny zava-nisy ny manodidina. Poa toy izay, nandriaka teo amin’ny arabe ny ra. Potika tanteraka nohitsian’ ilay kamiao teo amin’ny faritry ny lohany sy tendany ilay lehilahy. Maty tsy tra-drano izy. Araka ny filazan’ny nanatri-maso, nihazakazaka nitsofoka tao ambanin’ny kodiarana mihitsy io lehilahy io. Nifanindry an-dalana tamin’ny fandehanan’io fiara io ny fihetsiny ka izao nitera-doza izao. Etsy ankilany, nanokatra fanadihadiana tamin’ny antony nahatonga ny loza ny eo anivon’ny polisim-pirenena ao Ambanja. Naiditra am-balampamonjana, araka izany, ny kamiao nitera-doza. Notanana atao andrimaso sy fanadihadiana koa ny mpamily. Natolotra ny fianakaviany kosa ny vatana mangatsiakan’ilay namoy ny ainy taorian’ny fitsirihan’ny mpitsabo sy fahatongavan’ny tomponandraikitra tao an-toerana. Tsiahivina, vao ny 30 mey teo no nahafatesana raim-pianakaviana iray teny amin’ ny lalam-baovao Rocade Iarivo. Voahitsaky ny kamiao mpitatitra fako ilay rangahy. Nanao fanahiniana nitsoraka ambany kodiaran’ny fiarabe koa izy tamin’io fotoana io, araka ny fanazavan’ny nanatri-maso.
Tsiferana R.
French