Nomelohin’ny fitsarana hamita sazy mandra-pahafatiny i Berthino, raha voasazy 10 taona an-tranomaizina kosa ny namany iray antsoina hoe i Lahadraza. Io ny didim-pitsarana navoakan’ny mpitsara nandritra ny fitsarana raharaha ady heloka bevava tao amin’ny Lapan’ny fitsarana ambaratonga voalohany ao Toamasina, omaly. Samy niakatra fitsarana avokoa ireo roa lahy voampanga tamin’ity raharaha vonoan’olona ity. Maty nisy nitifitra tao Ankirihiry i Fidelis Voriolo, ny 19 janoary 2023. Tratran’ny polisy ny 28 marsa 2023 ireo roa lahy voampanga ireto rehefa nanao asa ratsy hafa indray niaraka tamin’ny fitaovam-piadiana mahery vaika. Tao anatin’ny fanadihadian’ny polisy no nahafantarana fa anisan’ireo tompon’antoka tamin’ny fahafatesan’ity raim-pianakaviana niharam-boina ity i Berthino sy Lahadraza. Ny fanadihadiana hatrany no nahafantarana fa fianakaviana akaiky ilay raim-pianakaviana ihany i Berthino izay nitifitra ka nahafaty azy. Niray tsikombakomba kosa i Lahadraza. Nahiditra vonjimaika ao amin’ny fonjaben’Ambalatavoahangy izy roa lahy taorian’ny famotoran’ny polisy ka izao niakatra fitsarana izao. Niaiky ny heloka vitany izy roa lahy teo anoloan’ireo mpitsara mpanao famotorana. Jiolahy raindahiny amin’ny fanafihana mitam-piadiana tao an-drenivohitry ny faritra Atsinanana izy roa lahy. Efa mpamerin-keloka izy ireo saingy miverina manohy ny asa ratsiny hatrany.
J.C
French