Nandeha mafy, fiara tsy mataho-dalana iray no tra-doza teny amin’ny RN12, ny 19 jona teo tamin’ny 3 ora sy 55 minitra maraina. Niala avy ao Irondro, nikasa ho any Vangaindrano io fiara io. Tsy nahafehy ny familiana tampoka anefa ny mpamily rehefa niditra teo amin’ny tanànan’i Mahazava, fokontany Irondro, kaominina ambanivohitra Antsenavolo, distrikan’i Mananjary. Nivoaka ny arabe avy hatrany ilay fiara 4×4. Nivadibadika inefatra ka potika tanteraka. Nahita ny loza ny mponina manodidina sy ny mpandalo ka niantso avy hatrany ny zandary. Nifampisokirina tao amin’ny toerana familiana ny mpamily saingy efa tapitra ny ainy.
Mpandeha iray voa mafy
Ankoatra io, nitaraina ho marary ao amin’ny faritry ny lamosiny koa ny ramatoa iray anisan’ireo mpandeha miisa dimy tao anatin’ny fiara. Nentin’ny tomponandraikitra eny anivon’ny hopitaly avy hatrany izy. Nozahan’ny mpitsabo kosa ny vatana mangatsiakan’ilay mpamily namoy ny ainy. Natolotra ny fianakaviany taorian’izay. Nanamafy tamin’ ny mpanao fanadihadiana ilay ramatoa mpandeha fa nandeha mafy ny fiara ka antony niteraka ny loza.
Tsiferana R.
French