Hotohoton’ny afo ny trano misy efitra roa tao amin’ny fokontany Mangarano I11/46, kaominina Toamasina, afakomaly alina. Nidona-tsetroka tampoka tao amin’io trano lasibatra io tamin’ny 8 ora alina. Nikoropaka niantso vonjy ny tompon-trano lasibatra. Niezaka hamoaka ny entana tao anatin’ny trano izy ireo saingy nihombo tao anatin’ny minitra vitsy ny afo. Nanao izay ho afany namonjena ny ainy sisa no azon’izy ireo natao. Nifanolo-tanana ny fokonolona namono ny afo, mba tsy hiparitaka amin’ny trano manodidina. Niantso ny sampana mpamonjy voina rahateo ny tsara sitrapo. Tonga ara-potoana ireto farany ka nanao izay ho afany nifehezana ny firehetana. Maty tanteraka ny afo taorian’izay, saingy tsy nisy entana azo noraisina intsony tao anatin’ny trano. Tsy nisy aina nafoy na naratra. Tsy fantatra mazava ny fototry ny firehetana hatreto.
Tsiferana R.
French