Voasambotry ny zandarimaria miasa ao amin’ny Zana-tobim-paritra zandarimaria ny ankizilahy tsy ampy taona nangalatra moto tao Sandrakatsy, kaominina Antanambe, distrikan’i Mananara Avaratra, ny 9 jolay teo. Napetran’ny tompony teo an-tokotany tao Ambodisatrana anatin’ny kaominina io moto manana tanjaka motera 125 cc io ny alatsinainy 8 jolay. Nanjavona tampoka tsy teo amin’ny toerana nametrahana azy intsony anefa ilay kodiaran-droa. Nisava ny manodidina nijery izay mety ho olona nanisaka io fitaovam-pitanterana io ny tompony saingy tsy nahita na inona na inona. Nanatona mpitandro filaminana avy hatrany izy ka nitantara ny toe-java-nisy. Nanao fikarohana ny zandary. Tratra teny amin’ny ankizilahy 16 taona ilay moto very ny marain’ny talata 9 jolay. Nosamborina avy hatrany io zaza tsy ampy taona io. Niaiky heloka tokoa izy fa naka ilay moto. Fanaony ny mangalatra satria efa naka telefaonina an’olona koa izy teo aloha, araka ny fanadihadiana nataon’ny zandary azy. Hatolotra ny fampanoavana aorian’ny famotorana azy io mpangalatra io.
Tsiferana R.
French