Naiditra vonjimaika ao amin’ny fonjan’Antanimora ny lehilahy iray nisoloky vola an-tapitrisany, afakomaly. Nisandoka ho olom-panjakana, nanambaka olona maro tamin’ny alalan’ny kaonty facebook, ity lehilahy ity. Tsy vitan’io, nisy tamin’ireo lasibatra nalainy baraka amin’ny alalan’ny tambajotran-tserasera ireo. Nahazo vola maherin’ny 20 tapitrisa Ar tamin’io asa ratsiny io izy. Rahonany ireo voasoloky sasany rehefa nanomboka nikaroka azy ny mpitandro filaminana taorian’ny fitorian’ireo olona voasoloky. Nataon’ny zandary sarika am-pandriana io mpisoloky io. Tratra tao amin’ny tranon’ny mpianatra tao Andrainjato, Fianarantsoa izy, ny alin’ny sabotsy 10 aogositra teo, tamin’ny 9 ora alina. Tsy afa-nandositra, nentina natao famotorana ka niakatra fampanoavana tetsy Anosy, ny 14 aogositra. Niafara amin’ny fihazonana am-ponja azy izany ka ho tontosaina amin’ny 10 septambra ho avy izao ny fitsarana ny raharaha.
Tsiferana R.
French