TSELATRA

Nalain’ny renim-pianakaviana iray ny vola rehetra teny am-pelatanan’ny reseverana taxi-be amin’ny zotra 133 mampitohy an’Itaosy Cité sy Analakely teny Andranona­hoatra, omaly. Tsy nety hanome ny famerim-bolany ilay resevera fa nolazainy fa efa nomeny ny famerim-bola kanefa nanizingizina ilay renim-pianakaviana fa tsy mbola nandray izany. Vokany, lasa ny vola rehetra teny an-tanany. Nihome­hezan’ny mpandeha tao anaty fiara ilay resevera.
Mitohy hatrany ny hazalambo ataon’ny mpitandro filaminana amin’ny fanenjehana ireo dahalo tompon’antoka tamin’ilay raharaha fakana an-keriny ao Marotsipoy Anjozorobe. Efa folo mahery ireo voasambotra tamin’iny raharaha famonoana ireo takalonaina nalaina an-keriny tao Marotsipoy iny. Ankoatra izay, dahalo hafa koa nanaovana didy fikarohana izay mpiray tendro amin-dRakom.
Nosamborin’ny zandary avy ao amin’ny zana-tobim-paritry ny zandarimaria Vontovorona ny mpivady malaza ratsy amin’ny fangalarana vorona. Mandalo eo akaikin’ny vavahadin’ny tranon’izy mivady ireo vorona dia alainy avy hatrany. Efa fanaon’izy ireo izany raha ny filazany tamin’izany zandary. Misy fotoana anefa averiny ihany ireo vorona rehefa hitan’ny tompony ny hakan’izy ireo izany.