Nakambana ho rafitra iray ny Sampandraharaha misahana ny fanofanana mahakasika ny vatosoa sy ny Laboratoara manao fitiliana ny harena an-kibon’ny tany samihafa. Hisy rafitra iray koa hiandraikitra ny fifanakalozan-kevitra raha sendra misy ny olana.
Hisahana ny fanadihadiana mahakasika ny vatosoa (gemmologie) ny Biraon’ny jeolojia, ny vatosoa ary ny laboratoaran’ny harena an-kibon’ny tany (BGGLM). Andraikiny koa ny fanomezana fanamarinana ara-dalàna ireo vokatra ambanin’ny tany izay nosahanin’ny Laboratoaran’ny harena an-kibon’ny tany eto Madagasikara (L2M) teo aloha, sy ny Biraon’ny jeolojia sy ny momba ny vatosoa eto Madagasikara (BGGM) teo aloha. Foana, araka izany, ireo didim-panjakana (2021-277), nivoaka ny marsa 2021, mamaritra ny sata mifehy ny BGGM, sy ny didim-panjakana 2019-1998, nivoaka ny novambra 2019, mamaritra ny sata mifehy ny L2M. Nankatoavin’ny filankevitry ny minisitra ny 4 septambra teo ny didim-panjakana manangana ny BGGLM.
Fanavaozana, entin’ity didim-panjakana ity ny fanitarana ny andraikitry ny BGGLM. Anisan’izany ny fanomezana fampiofanana ho an’ny mpandraharaha na ny daholobe mahakasika ny fanadihadiana ny vatosoa (gemmologie). Eo koa, ny fahafahany manome tolotra, manao fitiliana ara-teknika ny vatosoa ataon’ny laboratora ho an’ireo mpitrandraka indostrialy.
Komitim-pirenena
Nankatoavin’ny filankevitry ny minisitra ihany koa ny didim-panjakana mamaritra ny sata mifehy ny Komitim-pirenena momba ny harena an-kibon’ny tany (CNM). Mifanaraka amin’ny fehezan-dalana vaovao vao nivoaka ny fananganana ity komity ity. Sampandraharaha hisahana ny fifanakalozan-kevitra, ny fanamorana, ny fifampidinihina ary ny fampihavanana ny CNM. Navoaka ny didim-panjakana mba hampanara-dalàna azy, ho Sampandraharaham-panjakana manana sokajy ara-toekarena (Etablissement publics à caractère administratif à vocation économique).
Njaka A.
French