TSELATRA

Nitrangana fanafihan-dahalo mirongo basy mahery vaika tao Antsakoamarigne sy Andriambe, kaominina Imanombo, afakomaly. Lasan’ireo mpanafika ny fananan’ireo olona rehetra tao amin’io tanàna io. Olona iray maty notifirin’ireo malaso rehefa nikasa hanohitra. Tsy vitan’izay, mbola nodoran’izy ireo koa ny tanàna. Trano 48 tafo kilan’ny afo.
Naratra ny renim-pianakaviana iray nofaohan’ny bisikileta teny Anosibe, omaly maraina. Nandeha mafy ilay mpitondra bisikileta sady varian-dresaka tamin’ilay olona nentiny. Voafaoka tampoka ity vehivavy niampita ny arabe. Nentina namonjy toeram-pitsaboana avy hatrany izy.
Raim-pianakaviana handeha hamonjy asa vao maraina no niharan’ny fanendahana teny Andavamamba, omaly maraina. Teo am-piandrasana taxi-be izy no nifanehitra tamin’ny jiolahy roa nitondra antsy. Nitaky vola sy finday ireo olon-dratsy. Lasa nitsoaka ry zalahy rehefa nahazo izany.
Mirongatra ny fanendahana eo amin’ny fiantsonan’ny taxi-be Anosy rehefa amin’ny maraina sy hariva. Renim-pianakaviana iray no lasibatry ny olon-dratsy, omaly hariva, nandritra ny fisisihana. Lasan’ireo mpanendaka ny poketra. Naratra ny sandriny.