Nihaona tamin’ny filoha Rajoelina ireo mpandraharaha amin’ny lavanila, ny alakamisy teo teny amin’ny Lapan’Iavoloha. Isan’izany ny mpamokatra, ny mpikarakara,ny mpanangom-bokatra ary ny mpanondrana any ivelany. Nanatrika ny fotoana koa ny minisitry ny Toekarena sy ny tetibola sy ny Indostria (MEF), ny varotra ary ny fanjifana (MICC) ary ny tale jeneralin’ny haban-tseranana.
Araka ny fantagahan’ny mpanondrana any ivelany, nekena ny hitazonana ny vidin’ny lavanila maina ho 250 dolara ny kilao. Manoloana izany, tsy maintsy manavao ny fahazoan-dalany ireo mpanondrana any ivelany, hatramin’ny 13 febroary 2023 ho avy izao. Homena fe-potoana 15 andro izy ireo, hividy ny lavanila any ifotony araka izay lanja nahazoany fankatoavana. Raha tsy tanteraka izany na misy ny tsy tomombana, ho raisin’ny fanjakana ny ambin’ny lavanila tsy novidiana, ka hotsinjaraina amin’ny mpandraharaha hafa, izay homena fahazoan-dalana vaovao.
140 dolara ny lavanila « cuts »
Etsy ankilany, hitety firenena ny fanjakana sy ny mpanondrana any ivelany, hametraka paikady hikarohana mpividy ny lavanila malagasy, izay sangany maneran-tany. Azo ataon’ny mpanondrana ny mivarotra ny lavanila antsoina hoe « cuts » eo amin’ny tsena iraisam-pirenena. Izany hoe, ireo manana tahan’ny tsiro lavanila (vanilline) latsaky ny an’ny lavanila « gourmet », ka hatramin’ny taha 10% no azo ekena araka ny fahazoan-dalana nomena. Neken’ ny mpivory rehetra teny Iavoloha, omaly, ny hamerana ny lavanila « cuts » ho 140 dolara ny kilao.
Nomen’ny filoha Rajoelina toromarika ny minisitry ny MICC sy ny tale jeneralin’ny ladoany, handray fepetra hentitra sy henjana amin’ireo izay mikasa hanao hosoka na fanambarana diso.
Njaka A.
French