Nitohy tany Ihosy, Ihorombe indray ny fihaonan’ny mpitarika ny antoko Malagasy miara-miainga, Andrianainarivelo Hajo tamin’ny vahoaka, ny sabotsy teo. Nihaino ny olana sy ny hetahetan’ny tany an-toerana ny tenany. Nambarany tamin’ izany fa fotokevitry ny antoko sady vahaolana amin’izany ny fitsinjaram-pahefana. “Ahazoan’ny eny ifotony ny fahefana sy mitantana ny hoavy ary fanomezana andraikitra antsika amin’ny fiainana andavanandro izany”, hoy izy. Nanteriny fa mamaha ny olana eny ifotony izany fitsinjaram-pahefana izany ary mifandraika amin’ ny filàn’ny vahoaka. Na famoronana asa na fivelomana na koa ny fihariana…
Notanisain’ireo mponina rahateo ny olana sedrain’izy ireo. Ny olan’ny asa, ny fiompiana omby sy ny famokaram-bary…
Etsy andaniny, mbola notakin’ny MMM ny hanazavan’ny filohan’ny Repoblika, amin’ny nahazoany ny zom-pirenena vahiny. Notsiahiviny fa efa nangatahany fony izy mpitarika Tetezamita izany ary azony taty amin’ny taona 2014. “Ahoana no hinoana fa ho voaaro ny tanindrazana sy ny firenena raha nahazo zom-pirenena vahiny izy ? Mila valiana mazava izany… Filoham-pirenena ny resaka eto ary natao hiaro ny tombontsoam-pirenena sy ny fiandrianam-pirenena…”, hoy ihany izy. Nanteriny fa tsy azo ekena sy tsy mety izany ary manohitra izany ny MMM na iza te hitondra firenena na iza.
Synèse R.
French