Nentin’ny FFKM am-bavaka tetsy amin’ny FLM 67ha, omaly, ny faha-63 taona niverenan’ny Fahaleovantena sy ny fetin’ny Foloalindahy. Nohazavain’ny mpitandrina Andriamahazosoa Irako
tamin’izany ny dingana irosoana amin’ilay fihaonambem-paritra.
“Mahamenatra raha tsy mahita vahaolana ho antsika isika. Natao hifampihainoana sy hiresahana ny fihaonambem-paritra tanterahan’ny fiangonana io”, hoy izy. Notsiahiviny fa natao hananganana ny Andrimaso FFKM eny ifotony ny andro voalohany sy faharoa amin’ny fihaonana. Natao hanabeazana ny kristianina sy ny olom-pirenena izany. Entina hanarahana maso ny fifidianana, araka ny nambarany. Hiresahana ny olana sy ny hetaheta avy amin’ny mpizaika ny andro fahatelo. “Tsy mbola maka fanapahan-kevitra fa mila mifampihaino isika”, hoy izy.
Nitarika ny fotoam-pivavahana ny filohan’ny FLM, ny Rev Rakotozafy Denis. Nambarany teo am-panombohana fa manjakazaka ny tsy rariny sy ny fitsitokotokoana ary ny tsy rariny eny anivon’ny fiarahamonina sy ny tsy fifankahazoana. “Manalavitra an’Andriamanitra isika”, hoy izy. Namaky ny tenin’Andriamanitra kosa ny Mgr Razanakolona Odon. Nitondra ny teny fampianarana ny filohan’ny Anglikanina, ny Mgr Ranarivelo Samoela Jaona.
Mba tsy ho seho ivelany
Nivoitra tamin’ny fizarana aim-panahy fa tsy araka ny fikasan’Andriamanitra ny zava-misy eto amin’ny firenena. “Tsy mbola tara anefa raha hanangana firenena vanona isika”, araka ny nambarany.
Namaky ny ranom-bavaka ny filohan’ny FJKM. “Aoka ho porofoina amin’ny asa sy ny atao izany fiandrianam-pirenena sy ny fahaleovantena ary fitiavan-tanindrazana izany fa tsy atao seho ivelany fotsiny ihany”, hoy izy. Nentina am-bavaka koa ny hiatrehana ny fifidianana ka handalan’ireo tomponandraikitra rehetra sy ny olom-pirenena ny fahamarinana amin’izany.
Niatrika izany teny an-toerana ny avy amin’ny Ceni sy ny parlemanta ary koa ny mpanao politika vitsivitsy.
Synèse R.
French