Noraisin’ny filohan’ny Repoblika, teny Ambohotsirohotra, omaly, ny delegasion’ny Antoko kaominista sinoa (PCC). Voaresaka ny fiaraha-miasa eo amin’ny firenena roa tonta.
Notsiahivina tamin’izao fihaonana izao ny fanamafisana ny fifandraisana sy ny fiaraha-miasa eo amin’i Sina sy i Madagasikara. Niarahaba manokana sy nidera ary resy lahatra amin’ny fomba fiasan’ny filoha Rajoelina ireto delegasionina ireto. Nitarika azy ireo tamin’izany ny minisitry ny Departemantan’ny fifandraisana iraisam-pirenena eo anivon’ny komity foiben’ny antoko PCC, Liu Jianchao. “Betsaka ireo ezaka vitan’ny fitondram-panjakana tarihinao amin’ny fametrahana fotodrafitrasa maro, mifandraika amin’ny filan’ny vahoaka sy ny vina voarakitra ao anatin’ny Planina enti-mampandroso an’i Madagasikara (PEM)”, hoy izy ireo.
Fambolena sy ny fotodrafitrasa ary koa ny angovo
Etsy andaniny, nanaovana jery todika koa ny fiaraha-miasa eo amin’ny firenena
roa tonta. Naneho ny fahavononany hanohana hatrany ny fampandrosoana an’i Madagasikara ny firenena sinoa, eo amin’ny sehatra maro.
Anisan’izany ny fampiroboroboana ny fambolena, ny fotodrafitrasa momba ny lalana, ny famokarana angovo. Ny lafiny fiarovana, ny fitaterana an-dalamby sy ny fifanakalozana eo amin’ny sehatry ny kolontsaina, ankoatra ny lafiny fahasalamana niarahana niasa any Vatomandry sy i Bejofo Mahitsy ary Ambovombe. Efa maherin’ny 50 taona rahateo ny fifandraisana eo amin’ny firenena roa tonta.
Tsiahivina fa manana fiaraha-miasa amin’ny antokoben’ny fitondrana TGV/Mapar koa ny eo anivon’ny antoko kaominisita sinoa.
Synèse R.
French