Voatsatok’antsy teo amin’ny tendany ny raim-pianakaviana iray avy niasa, afakomaly alina. Vola 1 500 Ar anefa no tany aminy. Nalain’ireo jiolahy izany.
Vola 1 500Ar famerim-bolana taxi-be no saika namoizan’ny raim-pianakaviana iray ny ainy teny amin’ny tetezan’i Bekiraro Isotry, afakomaly alina. Notsatohan’ny jiolahy ny antsy teo amin’ny tendany raha iny handeha hody ho any Andranomanalina iny. Avy nirava niasa izy ka nandalo teo amin’ny tetezan’i Bekiraro no nandrasan’ny jiolahy telo niaraka tamin’ny antsy. Tsy nisy resaka fa fandrahonana avy hatrany no nasetrin’ireo olon-dratsy azy. Noteren’ireo jiolahy hamoaka vola sy finday. Nilaza ho tsy manam-bola izy fa famerim-bola avy nandehany taxi-be no misy any aminy. Tsy manana finday koa izy, araka ny nambarany tamin’ireo olon-dratsy. Romotry ny hatezerana ireo jiolahy sady nisava ny posiny. Lasa ny vola 1 500Ar tany amin’ilay niharam-boina.
Nihevitra hahita volabe ireo jiolahy
Tsy vitan’izay fa voadaroka izy no nazeran’ireo jiolahy tamin’ny arabe. Nohitsakitsahina sady notsatohin’iray nitazona antsy ny tendany. Soa ihany fa tsy tafalentika lalina ny antsy. Lasa nitsoaka ry zalahy rehefa avy nandratra ilay niharam-boina. Torana tsy nahatsiaro tena izy taorian’izay. Olona nahita azy tsy tafahetsika teo amin’ny arabe no nitondra azy namonjy hopitaly ka avotra soa aman-tsara ihany izy. Nihevitra ireto jiolahy ireto fa misy volabe any amin’ity raim-pianakaviana niharam-boina ity. Tsy nahita izay notadiaviny afa-tsy 1 500Ar anefa ry zalahy ka izao saika hamono hahafaty azy izao.
Faritra anisan’ny tena mampitaraina ny olona amin’ny tsy fandriampahalemana iny tetezan’i Bekiraro sy ny manodidina iny.
J.C
French