Mitondra fanazavana mahakasika ny mahasarobidy ny fahasalamana ara-tsain’ny reny Rabemananjara Kanto, izay manomana Ph.D momba ny “Psychologie clinique” ao amin’ny George Washington University any Washington DC, ary misitraka ny vatsim-pianarana Fulbright.
Ho an’ireo vehivavy bevohoka sy ireo mitaiza kely dia zava-dehibe ny fanohanana ara-tsaina azy ireo. Araka ny fikarohana dia 42% amin’ny reny malagasy no feno tebiteby loatra mandritra ny fitondrana vohoka. Ny10% amin’ny reny kosa no hita fa tratry ny fahaketrahana ara-tsaina ho an’i Toliara.
Mbola vitsy ny mpikaroka mandalina io lohahevitra io sy manao fikarohana mahakasika izany. Vesatra be ho an’ny fahasalamam-bahoaka anefa ny olana ara-tsaina mianjady amin’ny reny.
Zavatra tokony hahasambatra sy hampiadan-tsaina anefa ny fahaterahana sy fitondrana vohoka. Mila hazavaina amin’ny sain’ny reny ny mety ho fiovana amin’ny maha reny. Na ny tsy fahampian-torimaso sy ny fiovan’ny hormone rehetra dia misy fiantraikany amin’ny toe-po. Miteraka rarintsaina izany fiovana rehetra izany. Herintaona aorian’ny fiterahana dia tena misongadina izany.
Amin’io vanimpotoana io mihitsy no tena ilana tohana, satria manomboka tsingerina vaovao amin’ny taranaka manaraka mihitsy eo. Miova amin’ny ara-batana, ara-tsaina, fitaizana… Mivoaka daholo ny ratra rehetra fony fahazaza ka tena saro-pady io vanim-potoana io.
Feno fiovana sy tranga mety tsy hampoizina ny fiainan’ny reny manomboka eo.
Tatiana A
French