Lavon’ny balan’ny zandary nandritra ny fifanenjehana tao Andilamena, afakomaly, ny dahalo raindahiny fantatra amin’ny anarana hoe Rakotovelo Samuël Thierry na i Thierry. Tompon’antoka tamina halatr’omby tao amina fokontany Tsaratsabo, kaominina ambanivohitr’i Tanananifololahy, ny taona 2016, ity dahalo ity. Nambaran’ny zandary fa lehiben’ny tambajotran-jiolahy mpampihorohoro efa nigadra izy saingy nanohy ny asa ratsiny hatrany rehefa nivoaka ny fonja. Nokarohina an-taonany maro izy ka ny 7 desambra 2023 izy no saron’ny zandary avy ao amin’ny vondron-tobim-paritra Andilamena tao Antanimenabaka. Nilaza ity dahalo ity, nandritra ny famotoran’ny zandary, fa any amin’ny malaso iray antsoina hoe Jarivo, monina ao Befania Maroadabo, ao anatin’ny distrikan’ Andilamena, no misy ny basy Kalachnikov nampiasainy sy ireo ekipa tarihiny. Efa namoahana filazana fikarohana ny taona 2022 io namany io saingy tsy mbola hita hatramin’izao. Teny an-dalana hamonjy io toerana misy io basy Kalachnikov io izy no nitsoaka tampoka tany anaty ala. Raikitra ny fifanjevoana ka voatifitry ny zandary izy. Nanamafy ny kaomandin’ny vondron-tobim-paritr’Andilamena, ny kapiteny Tobiasy fa mitohy ny ezaka amin’ny fampandriana fahalemana ao Andilamena. « Mitohy ny hazalambo ireo dahalo mampihorohoro », hoy izy.
Jean Claude
French