Efa fantatra avokoa ireo firenena hiatrika ny lalao ampahefa-dalan’ny “Can 2023”, atao any Côte d’Ivoire. Hanokatra izany voalohany ny fihaonan’i Nigeria sy i Angola.
Hotanterahina anio, ao amin’ny kianjan’ny Le Felicia Côte d’Ivoire, ny fihaonana eo amin’ny Super Eagles, Nigeria sy ny Palancas Negras, Angola. Tafiditra amin’ny lalao ampahefa-dalan’ny fiadiana ny amboaran’i Afrika (Can 2023) ity atao ity. Ny ekipa nasionaly nizerianina, nanilika an’i Cameroun tamin’ny isa 2 no ho 0, nandritra ny ampahavalon-dalan’ny fifanintsanana. Lavon’i Angola, 3 no ho 0, kosa i Namibie, tamin’izany.
Tsara ny mampahafantatra fa indray mandeha nihaona ihany ny roa tonta tany amin’ny taona 2018. Resin’i Nigeria 1 no ho 0 i Angola, tamin’izany fotoana izany. Raha ny fikarohana natao, hotolorana lelavola 250 000 dolara ny ekipa nasionaly angoley raha mandresy ny nizerianina, miampy finday IPhone 15 iray avy.
Hanala vela amin’ i RD Congo i Guinée
Ankoatra izay, hifandona i RD Congo sy i Guinée. Fihaonana hotontosaina anio amin’ny 11 ora alina, ora eto amintsika, ao amin’ny kianjan’ny Allassane Ouattara Côte d’Ivoire. Mbola manala vela ny ekipa nasionalin’i Guinée amin’ity fifanandrinan’ny roa tonta ity. Niondrika teo anatrehan’ireo mpilalaon’i RDC tamin’ny isa 3 no ho 1 izy ireo, ny taona 2017. Tsara marihina fa hatao ny alarobia 7 febroary ho avy izao ny lalao manasa-dalan’ny “Can 2023”.
Fitia Randria
Fandaharan-dalao
Zoma 02/02/2024 :
8 ora alina : Nigeria vs Angola
11 ora alina : RD Congo vs Guinée
Sabotsy 03/02/2024 :
8 ora alina : Mali vs Côte d’Ivoire
11 ora alina : Cap Vert vs Afrika Atsimo
French