Nihaona tamin’ny solontenan’ny vahoakan’Avarandrano, teny Ambohimanambola, ny avy amin’ny Kolektifa ho an’ny Malagasy. “Hiainga eny amin’ny Antenimierampirenena ny fanovana tiantsika hatao”, hoy ny kandidàn’ny Kolektifa, Andrianainarivelo Hajo, teny Ambohimanambola. Nanteriny fa hanao lalàna iarovana ny tombontsoan’ ny besinimaro izy ireo. Anjaran’ny depiote koa ny manara-maso ny asan’ny governemanta na nahavita na tsia na hoesorina na koa alana ny filohan’ny Repoblika. “Manana adidy ny depiote amin’izany hanapa-kevitra. Zava-dehibe ny fahafantaran’ny depiote ny asa aman’andraikiny fa tsy ho mpanangan-tanana fotsiny ihany”, hoy izy. Nambaran’ny lisitra faharoa, Ratavilahy Andry, kosa fa miantoka ny fampandrosoana ny firenena ny depiote. Mahay sy mahafehy ny asany ka ilaina ny fahaizana mifidy, tsy hanaiky horebirebena intsony. Nanterin’izy ireo koa fa tsy atao ambanin-javatra ny fahasahiranam-bahoaka ary tsy afa-miala amin’izany ny depiote. Tsy maintsy miady amin’izany, araka ny nambarany. “Azo atao ny mampiasa ny volam-panjakana any amin’ny tena hetahetam-bahoaka mba hampandrosoana ny firenena ary mahavaly ny hetahetantsika izany”, hoy izy. Araraotin’olona isika anaty fahantrana, amin’ny alalan’ny rendrarendram-pifidianana, araka ny nambarany. Efa namitaka ny sasany amin’ireo teo aloha ireo ary miverina mirotsaka ka tokony ho felahana tehamaina. Nambaran’ny depiote amperinasa, Andriambelosoa Naina, kosa fa anisan’ny mibaiko azy ireo ka tsy nirotsahany intsony eny Avaradrano ny fanajana ny rafitra sy ny fandaminana. Eo koa ny tombontsoa ambonin’ ny firenena.
Synèse R.
French