Miantso ny mpikambana sy ny zanaky ny faritra ary ireo tsara sitrapo, hifanohana sy hifanome tanana ny Fikambanan’ny zanak’Alaotra (Fizalaotra). “Ndao isika hiara-hijery vahaolana entina miatrika ny olana maro samihafa aty, mba hisian’ny tena fampandrosoana mirindra sy hisitrahan’ny rehetra izany”, hoy ny filohany, Andriamahafaly Zaka, omaly. Nambarany fa misedra olana iny faritra iny. Anisan’ izany ny fiovaovan’ny toetr’andro ka miantraika amin’ny voka-bary. Tototry ny atsanga ny tanimbary noho ny fahasimban’ny tontolo iainana ka mampihena ny velaran-tany azo volena sy tsy ahafahana mampitombo ny vokatra. “Tsy ho sompitr’i Madagasikara amin’ny vary intsony ny faritra Alaotra”, hoy izy. Mitombo koa ny tsindry mianjady amin’ireo valanjavaboary arovana, toy ny Zahamena, ka mampananontanona ny faharipahan’ny ala sy ny harena samihafa ao aminy.
Ny fahasimban’ny fotodrafitrasa maro, toy ny lalana ka mampananosarotra ny fifamezivezen’ny mponina amin’ireo kaominina amin’ny distrika telo, ahitana an’ Ambatondrazaka sy Amparafaravola ary Andilamena.
Tsiahivina fa mankalaza ny faha-45 taonany ny Fizalaotra amin’ity taona ity. Homarihina amin’ny hetsika samihafa eto Antananarivo sy any amin’ireo distrika telo izany. Hosokafana ny sabotsy 20 avrily izao, eny Ivato, manomboka amin’ny 10 ora maraina. Arahin’ny fitsangatsanganana eny Ambohimalaza (Frère Capucin RN2), ny 8 jona. Eo koa ny fifanakalozana miaraka amin’ny fehin-kevitra amin’ny handraisana anjara amin’ny fampandrosoana ny sosialy sy toekarena any an-toerana.
Synèse R.