Voahosotra ho tompondaka maneran-tany amin’ny taranja Jiu-jitsu Breziliana i Chakif sy i Tafita. Fahatelo kosa i Christian tamin’ny fifaninanana natao tany Abu Dhabi, omaly.
Vokatra tsara no azon’ny solontena malagasy miatrika ny fiadiana ny tompondaka maneran-tany taranja Jiu-Jitsu Breziliana, any Abu Dhabi. Voahosotra ho tompondaka, Rafidinomena Toavin-Tafita, teo amin’ny Men’s Gi / White / Amateur / 62kg. Toraka izany koa i Chafik Bigjee, teo amin’ny Men’s Gi / White / Amateur / 56kg. Laharana fahatelo ka nahazo ny medaly alimo, Ranaivomanana Niriniaina Christian, teo amin’ny Men’s Gi / White / Amateur / 56kg.
Mafy ny ady natrehin’ny atleta malagasy. Tsy latsaky ny dimy ny ady natrehina vao tonga tamin’ny toerana nisy azy avy izy ireo. Ho an’ny sokajy 56kg, tafaraka sokajy i Chakif sy i Christian ary tafahaona teo amin’ny ampahefa-dalana. Anisan’ny nifanandrina tamin’izy ireo, i Mohamad Abdallah, i Sham khafaji ary i Mohamad Sharko.
Ho an’i Tafita kosa, ady dimy no natrehiny ka nandresy hatramin’ny farany izy, nanoloana an’ Ivan Vinograd, i Karim Saati, i Mario Cristavo, i Boromand ary i Orozbektov. Medaly volamena roa sy alimo iray izany izao no efa eo am-pelantanan’ny Malagasy mpikatroka, hatreto.
Mitohy anio!
Mbola hitohy anio ny fifaninanana ho an’ny Malagasy mpikatroka, ao anatin’ity fiadiana ny tompondaka maneran-tany ity. Atleta enina no hifaninana, anio. Anisan’izany i Rina hiditra amin’ ny andro faharoa eo amin’ ny sokajy “Amateur”. Hiady aorian’ izay i Zoaina sy i Tsivery, eo
amin’ny sokajy “Masters” ary hamaranana ny fifaninanana i Andy, i Fifaliana ary i Tsinjo, eo amin’ny sokajy “Professionnel”. Mbola manantena hahazo vokatra tsara izy ireo. Tsiahivina fa mpikatroka 10 izay no nahavita ny anjarany. Ny telo no nahazo medaly. Resy teo amin’ny fihodinana voalohany avokoa ny enina. Nihintsana teo amin’ny ady faharoa natrehiny ny atleta iray.
Mi.Raz
French