Fotoana manaraka hamirapiratan’ny foron-damaody sy ny haihaingo. Hotontosaina ny 26 sy 27 septambra izao ny “Tana Fashion Days by Yas”, araka ny fanambarana ofisialy natao omaly, tetsy amin’ny foiben’ny Yas Andraharo. Hampiray amina toerana sy fotoana iray ireo mpisehatra rehetra amin’ny haihaingo sy ny lamaody ny tanjona. Eo ireo mpamorona, mpilatro, mpanaingo, mpaka sary, mpiserasera sns, hiaraka hiketrika ny haihaingo ho an’ny rahampitso.
“Efa ela no nisy teto Madagasikar ny indostrian’ny haihaingo sy ny lamaody, indrindra taorian’ny fiakaran’ny orinasa afaka haba ny taona 1990. Nangingina anefa izany tato ho ato ka tianay ny hamoha izany indray amin’ity fotoana ity”, hoy i Elia Ravelomanantsoa, izay mpanorina ny “Festival Manja”, hetsika namirapiratra ho an’ny lamaody tamin’izany fotoana.
Maromaro ny fanadaharam-potoana mandritra ireo roa andro an-damaody ireo. Eo ny adihevitra isan-karazany sy araka ny lohahevitra. Arahina fizarana traikefa hatrany ireny, satria hisy vahiny maro matihanina eo amin’ny sehatry ny lamaody no ho avy handray anjara. Hatokana hanehoana ireo forona vaovao eo amin’ny sehatry ny haihaingo kosa ny andro faharoa. Hisy ny filatroana iarahana izay hanampy tosika ny varotra fampirantiana.
Zo ny Aina
French