Iray amin’ireo hetsika kolontsaina lehibe indrindra fanao isan-taona ny “Madajazzcar Festival”. Misy hatrany ny fanatsarana sy ny fanatevenana. Tranga mitarika any amin’ny fivelarana lehibe, amin’ny lafiny maro izany.
Tafiditra ao anatin’ny andiany faha-36 ny “Madajazzcar Festival” ho an’ ity taona 2025 ity. Fisokafana sy fivelarana lehibe no ho hita manomboka ny 2 ka hatramin’ny 12 oktobra izao. Manasongadina izany avy hatrany ny lohahevitra « L’interculturalité et de la diversité », fihaonan’ny kolontsaina samihafa sy ny fanajana ny fahasamihafana ny lohahevitra ankapobeny.
Nitombo ihany koa ny firenena handray anjara. Hahatratra hatrany amin’ny 10 any ho any izy ireo : Alemainina, Italia, Belzika, Frantsa, Mali, Kenya, La Réunion, Madagasikara, Norvezy, Etazonia (miandry fanamafisana amin’ ny herinandro ambony). Hivelatra ihany koa ny toerana sy ny tanàna hanatanterahina ny heztsika. Hisy ny « Tremplin Madajazzcar » avokoa izy ireo. Izany hoe, hisy fanofanana sy fifaninanana any Antsirabe, Fianarantsoa, Toamasina, eto Antananarivo. Izay laharana voalohany any an-toerana, hiatrika ny famaranana eny amin’ny Oniversiten’ Antananarivo, ny 8 oktobra izao.
Nohatsaraina ihany koa ny fanatanterahana ny fandaharam-potoana. Ho an’ireo andiany teo aloha, sahirana ny mpitia jazz, satria, misy fotoana mifanindry. Ho an’ity andiany faha-36 ity, tsy hisy intsony izany. Na andro iray aza no hisian’ny seho, ho samihafa ny ora. Natao ho seho roa isaky ny hariva. Handray ireo mpilalao jazz anisan’ny sangany maneran-tany ihany koa ny “Madajazzcar 2025”. Anisan’izany i Sidiki Camara (Malianina) izay miavaka amin’ ny fahaizany mifehy ireo karazan-gadona samihafa amin’ny alalan’ny amponga. Fantatra fa nangataka ny harahin’ny mpitendry jazz teratany malagasy izy mba hisian’ny fifanakalozana, tsy eo amin’ny mozika ihany fa hatrany amin’ny toe-tsaina, kolontsaina sy fomba fiaina.
… « Anisan’ny andrasantsika amin’ity andiany faha-36 ity ny firaisam-po ao anatin’ny fahasamihafana. Tsy any anaty mozika ihany fa eo amin’ny fiarahamonina sy ny fiainana andavanandro mihitsy », hoy i Jackie Ranarison, filohan’ny kaomity mpanatanteraka ny “Madajazzcar Festival”.
HaRy Razafindrakoto
French