Mitohy ny fidinana an-dalambe ataon’ny tanora. Nirefodrefotra ny baomba mandatsa-dranomaso, omaly. Milaza ny hihetsika koa manomboka izao ny mpanohana ny fitondrana.
Niafara tamin’ny fipoahan’ny lakrimozenina hatrany ny hetsika fitakiana nataon’ireo mpitolona eo anivon’ny Gen Z sy ireo mpiasam-panjakana, omaly. Maherin’ny 8 ireo naratra ka ankizy roa voa mafy. Renim-pianakaviana iray koa naratra teo amin’ny tongony ka voatery nentina namonjy toeram-pitsaboana. Tsy tafiditra ny Kianjan’Ambohijatovo izy ireo fa voasakan’ny mpitandro filaminana. Niatrana an-kianja sy teny amin’ireo toerana ahina hivorian’ny mpitokona ny mpitandro filaminana. Niambina ny Kianjan’ny 13 mey sy Kianjan’ny demokrasia izay navadika ho zaridaina Ambohijatovo, izy ireo. Nizarazara toy ny mahazatra ny fidiran’ny mpitolona. Tanjona ny hahafahana miditra an’Ambohijatovo. Nisy ny fidirana avy any Antanimbarinandriana, Anosy, Besarety, Andravoahangy Ambony. Nifanao fotoana teo Antanimbarinandriana ireo mpiasam-panjakana isan-tsokajiny, omaly. Nitandahatra niaraka tamin’ireo mpanao fitakiana koa, ny Randrana sendikaly sy ireo mpitsabo mpanampy sy ny maro hafa nanomboka tamin’ny 10 ora maraina. Nikasa hiditra an’ Ambohijatovo izy ireo, tamin’ ny 11 ora mahery, fa naparitaky ny mpitandro filaminana tamin’ny fandatsahana entona mandatsa-dranomaso. Hita teny an-toerana ihany koa i Rolland Ratsiraka niaraka tamin’ireo mpitolona saingy fotoana vitsy monja.
Nihamafy ny fifanjevoana
Nihamafy ny fifanenjehana sy fifanjevoana teo amin’ny roa tonta. Nidina ifotony nitifitra sy nanaparitaka ireo mpitolona tamin’ny alalan’ny baomba mandatsa-dranomaso hatrany ireo mpitandro filaminana. Noravaina sy naparitaka avokoa ireo nivorivory teny amin’ny lalana rehetra. Nanomboka tsy nahazo nandehanan’ny fiara sy ny mpandeha an-tongotra ny lalana hihazo an’Ambohijatovo, tamin’ny 11 ora sy sasany atoandro. Hentitra ireo Tafika sy zandary nanao ny sakan-dalana, manoloana izany. Etsy ankilany, nisy fihetsiketsehana sy nahitana tanora nivorivory ihany koa teny Anosy, manoloana ny hopitaly Befelatanana. Nifanjinja sy nifanenjika hatrany an-tokontanin’ny hopitaly izy ireo sy ny mpitandro filaminana.
Niditra avy any Behoririka
Nikasa hiditra avy any Behoririka sy Andravoahangy Ambony ary Besarety ireo andian-jatovo. Voasakana sy nohenjehin’ny mpitandro filaminana avokoa izy ireo satria efa niatrana teny amin’ny manodidina ireo polisy sy zandary. Nikasa hiditra hatrany izy ireo saingy norarafan’ny mpitandro filaminana entona mandatsan-dranomaso hatrany. Manoloana izany, tsy niala fa nanao sakana tamin’ ny alalan’ny fandoroana kodiarana sy hazo teny afovoan’ny arabe ireo andian-jatovo ireo.
Marihina fa hiditra an-tsehatra ihany koa manomboka izao ny mpanohana ny fitondrana. Mitsipaka ny fanonganam-panjakana.
Mino / Tsiferana R
French