Andry iankinan’ny fampandrosoana ny firenena ny fampandehanana ny toekarena. Antony mahatonga ny rafi-panjakana manamafy ny fifandraisana amin’ny sehatra tsy miankina.
Zava-dehibe ny fifanohanan’ny roa tonta ho an’ ny tombontsoan’ny firenena sy hanatrarana ny tanjona iraisana. « Mifarimbona avokoa ny rehetra raha tiana hatanjaka ny fototry ny fanavaozana ara-toekarena », hoy ny minisitry ny Fampiroboroboana ny indostria sy ny fampivelarana ny sehatra tsy miankina (MIDSP), Rasoarahona Andriniaina, nandritra ny fihaonany tamin’ny vondron’ny orinasa afaka haba sy ny mpiara-miombon’antoka aminy (GEFP), tetsy Anosy. Vonona hihaino sy hifanatona amin’ny sehatra tsy miankina ary hijoro ho mpitondra teny ny minisitera. Tanjona ny hanavaozana indray sy hanorenana ny toekarena, hananana ho avy mamiratra. Manana anjara toerana lehibe eo amin’ny toekarena ny « zones et entreprises franches » (ZEF). Mahatratra 172 ny faritra sy orinasa afaka haba eto Madagasikara izay mampiasa olona manodidina ny 180 000 ary mampidi-bola vahiny betsaka. Ho jerena, araka izany, ny fanavaozana ny lalàna mifehy ny ZEF hanatsarana ny sehatra. Miandrandra ny hametrahana sehatra voatokana na filankevi-pirenena hifanakalozan’ireo mpisehatra ao anatin’ny tontolon’ny ZEF ihany koa ny GEFP.
Tondrozotra
Paikady apetraky ny minisitera ny hananana tondrozotra hiasany sy hitondrana ny fanavaozana apetraka. Hanamafisana ny tontolo ara-indostrialy sy hisarihana ireo mpampiasa vola ary hanohanana ny sehatra tsy miankina ny paikady « Quick Wins ». Manainga ireo mpiara-miasa aminy ny minisitra hanao tantsoroka amin’ny fampandrosoana ny sehatra tsy miankina sy ny indostria. Marihina fa fanoitra amin’ny fampandrosoana ny toekarena ny fampiroboroboana ny orinasa madinika sy salantsalany (PME). Tsiahivina fa anisan’ny manome asa sy mandray anjara amin’ny fampakarana ny harinkarena faobe ny tontolon’ny fandraharahana.
Henintsoa
French