Tafiditra ao anatin’ny fanavaozan-drafitra apetraky ny fanjakana ny Politika hampandrosoana ny orinasa, fototry ny fampandrosoana ny toekarena. Hojerena manokana ny fomba hanampiana ny Malagasy mpandraharaha.
«Hamolavola politika ho fampiroboroboana ny orinasa ny minisiteran’ny Fampiroboroboana ny indostria sy ny fampivelarana ny sehatra tsy miankina (MIDSP). Hapetraka ihany koa ny Tahirim-pirenena entina hampandrosoana ny orinasa », hoy ny minisitra Rasoarahona Andriniaina. Nandritra ny fanokafana ny « Forum national des entrepreneurs » andiany fahafito, tetsy Antaninarenina, omaly, no nanambarany izany. Fanoitra ho an’ny fanovana sy fampandrosoana ny toekarena ny fandraharahana, noho izy miteraka asa sy manokatra lalam-barotra maro. Ao anatin’ny fanavaozana apetraky ny fanjakana ny mametraka ny Politika hanatsarana ny tontolon’ny fandraharahana. Araka izany, “hotanterahina tsy ho ela ny fikaonandoham-pirenena entina hanarenana ny toekarena. Fotoana iray handraisana ny hevitry ny rehetra ka handrafetana ny politika hanampiana ny indostria malagasy io”, hoy hatrany ny minisitra. Marihina fa 90% ny orinasa eto amintsika dia madinika avokoa ka mila tohana.
Sedra
Ankoatra ny olan’ny angovo, mbola sarotra ho an’ny mpandraharaha ny fampaharetana ny orinasany. « Hisy ny fifanakalozan-kevitra iarahana amin’ireo matihanina samihafa», hoy ny mpikarakara ny forum, Raharison Diary. Notohizan’ny tale mpanatanteraka ny Madagascar Entreprise Development (MED), Randriamanantena Landry, fa hisy ny fampianarana ny hampidirana ny haitao ara-kajy mirindra eo amin’ny asa aman-draharaha andavanandro, hanatsarana an’io tontolo io.
Henintsoa
French