Nitrangana fihotsahan’ny tamboho, nahafatesana vehivavy 30 taona, tetsy Itaosy, fokontany Marobiby, kaominina Fihombonana, disitrikan’ Antananarivo Atsimondrano, afakomaly tamin’ny 7 ora hariva. Nianjera tamin’ny trano nahitana rihana roa, misy efitra enina teo ho eo, ny tamboho iray. Efa-mianaka izy ireo no tao an-trano, nahitana renim-pianakaviana iray sy ny zanany telo ary mpanampy iray. Tsy tao an-trano ny raim-pianakaviana tamin’io fotoana io noho ny asa aman-draharahany. Vokany, namoy ny ainy tototry ny tany sy biriky, nandritra izany, ny vehivavy iray 30 taona, izay mpanampy an-trano. Avotry ny fokonolona kosa ireo olona hafa. Nisaotra ny mponina niara-nisalahy tamin’ny fanampiana noho ny fanavotana sy fisokirana ireo olona tototry ny tany ny ben’ny Tanànan’ny kaominina Fiombonana, Randriamanantena Gabriel. Tonga teny an-toerana nisehoan’ny loza ny avy amin’ny vondron’ny mpamonjy voina sy ny mpitandro filaminana avy eny Itaosy. « Entanina ny rehetra mba ho mailo sy hampandre ny tomponandraikitra avy hatrany raha misy ny tranga mampiahiahy, indrindra amin’izao vanim-potoanan’ny orana izao, mba hisorohana ny loza tahaka izao », hoy hatrany ny ben’ny Tanànan’ny kaominina Fiombonana. Taorian’ny loza, nisy ny fifampiresahana ka mandray andraikitra manoloana ny fikarakarana ny razana ny tompon’ilay tamboho nianjera.
Mino
French