Mitohy hatrany ny ady amin’ny valala tanterahin’ny fitondram-panjakana. Tafiditra ao anatin’ny politikan’ny fanavaozana ny famokarana eny ambanivohitra sy ny fanamafisana ny fiarovana ara-tsakafo nasionaly izany. Tamin’ity taona ity, maherin’ny 24 000 ha ny tanety voatondraka fanafody ary mbola hotohizana mandritra ny volana janoary 2026 ny tetikasa amin’ny alalan’ny fametrahana ny tobim-pibaikoana an-tanety efatra. Hisy hatrany ihany koa ny fitiliana atao ary mety hiampy ireo tobim-pibaikoana. Hamafisina ny fanaraha-maso ana habakabaka amin’ny fampiasana ny angidimby miisa roa mba hisorohana ny fihanaky ny valala mankany amorontsiraka atsimo sy atsimo andrefan’ny Nosy. Marihina fa ny kijeja na zana-balala no betsaka indrindra hita tany Andonaka, distrikan’Ambalavao sy tao Zomandao, distrikan’Ihosy. Tsiahivina fa efa tonga tao Toliara, ny 22 desambra teo, ny “Téflubenzuron”, fanafody natokana manokana hamonoana ireo kijeja, milanja 50 000 litatra. Nalefa avy hatrany any Ihorombe sy Sakaraha ireo fanafody ireo mba hisorohana ny fihanaky ny valala.
Henintsoa
French