Nankalazaina omaly 26 janoary, teny amin’ny CCI Ivato, ny Andro iraisam-pirenena ho an’ny Ladoany (JID). Lohahevitra noraisina ny hoe, «Habantseranana miaro ny fiarahamonina, amin’ny alalan’ny fahamailoana sy ny fahitsiana». Nampahatsiahivin’ny tale jeneraly ny Ladoany (DGD), Randrianjafy Antoine, ny maha zava-dehibe ny fiarovana ny fifanakalozana ara-barotra, ny olom-pirenena ary ny fanohanana ny fampandrosoana ny toekaren’ny firenena.
Nasian’ny filohan’ny Fanavaozana ny Repoblika (PR RM), kolonely Randrianirina Michaël, teny ny mahakasika ny fisavana ny entany nandritra ny diany nankany Dubaï farany teo. « Izaho mihitsy no nampiantso ny habantseranana tamin’iny. Na iza na iza filoham-panjakana dia miondrika eo anatrehan’ny lalàna. Mifanandrify amin’ny vina apetraky ny fitondram-panjakana ny teny faneva, firenena mahay miaro ny vahoaka sy ny harena ao aminy. Tsy fanovan-drafitra fotsiny ny andraikitry ny Fadintseranana fa fanovam-penitra, ny ady amin’ny kolikoly, mila mpiasa mahay, manana hazondamosina”, hoy izy.
Mifanome tanana
Nanamafy ireo ny minisitry ny Toekarena sy ny fitantanam-bola, Dr. Ramiarison Herinjatovo. « Mitana andraikitra lehibe ianareo mpiasan’ny Ladoany miaraka amin’ny minisitera ary mifanome tanana isika », hoy izy.
Miisa 20 ny mpiasan’ny habantseranana nomena mari-pankasitrahana, omaly.
Njaka A.
French