Hisy ny « Soirée Gala » atao etsy amin’ny kaominina Antananarivo Renivohitra, ny alarobia 15 avrily 2026 ho avy izao, amin’ny 7 ora sy sasany hariva. Hetsika karakarain’ny fikambanana Wednesday Morning Group (WMG), tohanan’ny Yas Madagasikara. Nampitondraina ny lohahevitra hoe : “Les femmes se lèvent de l’ombre à la lumière” na vehivavy matanjaka, mijoro, ary mamiratra eo anivon’ ny fiarahamonina. « Fotoana hampisehoana sy hanomezan-danja ny talentan’ny mpamorona eo amin’ny tontolon’ ny zaitra sy ny lamaody eto Madagasikara », hoy i Fiona Tsiranana, filohan’ny fikambanana WMG, nandritra ny fampahantarana ny hetsika tetsy Andraharo, omaly. Ho avy handray anjara hanafana ny lanonana ny mpisehatra maro eo amin’ny tontolon’ny zaitra sy ny lamaody: toa an-dry Eva Lamba, Feel Good, Gaona, Jaomatanna, Meva Sany, Jaomatanna, Maeva Sany, Sih Rakout ary Tahra. Fotoana hanehoan’izy ireo ny talentany amin’ny alalan’ny fampirantiana ny lamaody sy ny zavakanto ataon’izy ireo. Tanjon’ny hetsika, ny hanampiana ireo vehivavy raisin’ny fikambanana WMG an-tanana amin’ny lafiny zaitra sy ny crochet ary ny informatique digital. Eo koa ny hahazahoan’ny vehivavy fizakan-tena sy ny maha izy azy eo amin’ny sehatry ny asa. «Atokana hanampiana ireo sekoly sahirana sy entina hanaovana ny fiofanana maimaimpoana ho an’ireo vehivavy sahirana liana amin’ny asa soa ataonay ny vola rehetra azo amin’io hetsika io », hoy ihany izy.
« Laharam-pahamehana ho anay ny fanampiana sy fanohanana ny vehivavy ka antony nahatonga anay nanohana ny hetsika », hoy kosa ny avy amin’ny Yas Madagasikara.
Mino
French