Rafitra fifanakalozana nasionaly “Rahaka”: Hanamorana ny fomba fiasa amin’ny fitantanana

Hampitsahatra ny fomba fiasa misaratsaraka ny tanjona nametrahana ny “Rahaka”. Rafitra iombonana hanamorana ny dingana sy ny asam-panjakana.

Nampahafantarina omaly, teny Ivandry, ny rafitra fifanakalozana nasionaly “Rahaka”, hanatsarana ny tolotra ho an’ny va­hoaka mpisitraka. “Napetraka ny lalàna mifehy sy ny fahafahana rehetra mampifandray ny angon-drakitra any amin’ny andrimpanjakana sy ny orinasa tsirairay hanafainganana ny tolotra momba ny raharaham-panjakana samihafa”, hoy ny minisitry ny Fam­piro­bo­ro­boana ny haitao ara-kajy mirindra sy ny paositra ary ny fifandraisan-davitra, Andria­mam­piadana Mahefa. Tanjo­na ny mba tsy hivezivezen’ny olona intsony fa azo atao ana habaka ny zavatra rehetra. Ohatra, eo amin’ny fitsaboana, karapanondro fotsiny no entina dia voarakitra ao avokoa ny mombamomba ara-pahasalamana re­efa hanatona mpitsabo. Efa nivoaka ny volana desambra lasa teo ny Didim-panjakana mirakitra ny fametrahana ny “Rahaka” ary iantohan’ny fanjakana ny fiarovana ny angon-drakitra rehetra.
Nampiasaina voalohany ta­min’ny alalan’ny orinasa ny rafitra fifanakalozana hanamorana ny dingana rehefa hanorina orinasa ary tafiditra tao ny EDBM, ny Cnaps, ny Instat, ny DGI ary ny minisiteran’ny Fitsarana. “Nokiraki­raina nandritra ny fisoratana anarana biometrika koa ny fa­hafahan’ny rafitra mifandray”, hoy ny tomponandraikitry ny Unité de gouvernance di­gi­ta­le (UGD), Randriamanana Zo.
Nisy koa ny fanentanana ireo minisitera samihafa sy ny sehatra tsy miankina hiditra ao amin’ ny rafitra “Rahaka”. Ma­me­traka fifanarahana miaraka amin’ny UGD ireo vonona ho an’ny lafiny lalàna, hiantohana ny fiarovana ny angon-drakitra ka sa­my tompon’andraikitra ny rafitra tsirairay tompon’ny angon-drakitra. Nandritra ny fampahafantarana ny “Rahaka” teny Ivan­dry, niroso tamin’ny fi­fanara­hana hidirana ao anatin’ny rafitra fifanakalozana na­sionaly ny Banky foiben’i Ma­da­gasikara, ny orinasa fiantohana Aro.
Samy hahazo tombony avokoa na ny olom-pirenena na ny fanjakana, satria ho an’ny sokajy voalohany, hihena ny fotoana sy ny vola lany hivezivezena mikarakara taratasim-panjakana, mora kokoa ny dingana arahina. Ho an’ny fanjakana, mirindra ny fitantanana ny raharaham-panjakana ary tsy misy ny “doublons”.

Vonjy