Fotodrafitrasa vaovao efatra momba ny fanabeazana no notokanana tao Antsirabe I sy II, ny faran’ny volana lasa teo, ao anatin’ny tetikasa “Anjara”, tohanan’ny Vondrona eoropeanina. Tanjona ny hampisitraka zo ireo zaza amin’ny fanatsarana ny fahazoana fanabeazana any an-dakilasy. EPP Tsivatrinikamo, CEG Tsiafahy, EPP Fiadanana ary CEG Andranomanelatra no niantefan’ny tetikasa. Efitran-tsekoly, toerana manokana ho an’ny mpanabe, toeram-pivoahana ho an’ny mpianatra ary nosarahana ny an’ny ankizivavy sy ny ankizilahy, no noraisina tamin’izany. Natao manaraka ny fenitra azon’ny olona manana fahasembanana ara-batana hivezivezena ny fotodrafitrasa rehetra, araka ny fanazavana azo.
Tombanana hitondra vokatra tsara amin’ny tahan’ny fanadinana sy hampihena ny tsy fisitrahana fanabeazana, indrindra ho an’ny zatovovavy sy ny olona manana fahasembanana ny fotodrafitrasa napetraka. Misahana miaraka ny tetikasa ny fikambanana SOS Village d’Enfants, ny Action Education ary ny Vovonan’ny firaisamonimpirenena misahana ny ankizy (PFSCE). Manohana ny tetikasa kosa ny vondron’olona eny ifotony sy ny Feffi.
Ho fanamafisana ny fanohanana ny mpampianatra sy ny kalitaon’ny fanabeazana, nambaran’ny minisitry ny Fanabeazam-pirenena, Rajaonarison Sendra Nirina, fa horaisina ho mpiasam-panjakana raikitra ireo mpampianatra Fram miisa 18 miasa amin’ireo sekoly voakasika.
Vonjy
French